Jóna Hrönn Bolladóttir prestur hefur valið orð úr Biblíunni, skrifað út frá þeim stuttar hugvekjur eða bænakveikjur og fundið bókarköflum yfirskriftir sem snerta hverja manneskju. Hún fékk með sér í bænaskrifin prestana Dag Fannar Magnússon, Hildi Eir Bolladóttur, Jóhönnu Magnúsdóttur og Guðmund Brynjólfsson djákna og rithöfund. Allar 132 bænir bókarinnar og tíu trúarjátningareru frumsamdar. 

 Þessi bók endurspeglar á hverri síðu djúpa lífsþekkingu og sterka vitund um að allt er í Guðs hendi. 

Þemu bænabókarinnar eru: Gleði, gestrisni, foreldraábyrgð, endurfæðing, seigla, skömm, fyrirgefning, reiði, skilyrðslaus kærleikur, sorg, jaðarsetning, samlíðan, virðing, vinátta, hugrekki, innsæi, samfélag, angist, friður, ofbeldi, Krossinn, upprisan. 

Mörg teljum við þakklætið æðst allra dyggða. Hver einasta bæn er þakkarbæn þótt bænarefnin geti verið þung og sár. Bænalíf sýnir okkur veruleikann í öllum sínum litbrigðum með ástaraugum Jesú. Bænin vinnur gegn óheiðarleika og leiðir til sjálfsþekkingar. Dýrmætast er þó hvernig hún hjálpar okkur að elska aðra. Er við förum að biðja fyrir mönnum og málefnum opnast hjartað og þyrstir eftir réttlæti.
Jesús gaf okkur nýtt boðorð: Að við elskum hvert annað eins og hann hefur elskað okkur. Bænalíf er þátttaka í þeirri viðleitni. Því er svo hollt að biðja.