Hér er rætt við samferðafólk okkar sem hefur horfst í augu við sorgina og þurft að heyja glímu sem fæstum er létt. Einstaklingarnir í bókinni segja heiðarlega frá og á opinskáan hátt. Þetta er lesning sem getur tekið á en hún er holl. Sérstaklega er lærdómsríkt að fræðast um bjargráðin, aðferðirnar sem þetta góða fólk notaði til þess að lifa með sorginni og vinna úr henni.

Viðmælendur eru:

Ína Lóa Sigurðardóttir, Björn Hjálmarsson, Rósa Kristjánsdóttir, Aðalbjörg Stefanía Helgadóttir, Ástvaldur Traustason, Katla Njálsdóttir, Ágústa Amalía Sigurbjörnsdóttir, Kári Hreinsson, Kristín Sif Björgvinsdóttir, Sigfinnur Þorleifsson, Sigurbjörn Þorkelsson, Vilborg G. Guðnadóttir, Jóna Hrönn Bolladóttir, Sigurður M. Jónsson, Guðrún Karls Helgudóttir, Vigfús Bjarni Albertsson.

Þetta er þriðja bókin í röð bóka sem Vigfús Bjarni Albertsson skrifar um sorgina og margbreytilegar hliðar á því sérstaka ástandi. Sú fyrsta, Hver vegur að heiman er vegur heim, er tilraun til að líta inn á við bæði fyrir sálgætinn og skjólstæðinga hans. Önnur bókin Sár græða sár eru hugleiðingar um hvernig við eigum að koma að þjáningunni, virða hana og reyna að skilja tilgang lífsins. Hér er svo komin bókin Von að láni sem hefur að geyma viðtöl um sorg og sorgarviðbrögð, um úrvinnslu sorgar, um sátt og sigra. Hér er að finna hlý og nærandi viðtöl við fólk víða að úr samfélaginu sem hefur fengið von að láni til þess finna sig í því að takast á við eigin sorg  og stundum einnig til þess að  vinna með sorg annarra.

Þetta er bók sem knýr þig til að taka þér lestrarhlé og ígrunda og láta hugann reika um stöðu mannsins frammi fyrir tilfinningum sem mun heimsækja okkur öll áður en yfir lýkur. Þetta er bók sem stendur undir nafni því hvar sem þú ert og hvernig sem á stendur mun hún lána þér von.